عند إختيار شريك الحياة دايما بنلاقى نصائح كتير أوى للبنات إزاى تختار زوجها صح تختار الجذاب أو الرومانسى أو الحنين أو الغنى حاجات كتير أوى، وكتير أوى من البنات بتنسى إن هى كمان مطلوب منها حاجات أكتر عشان تبقى شريكة حياة ،واختيار صح مش بس تبقى شكل جميل ومظهر من بره بس.. لا حاجات كتير عشان تستاهل راجل بجد وعشان هم الإتنين يكملوا حياتهم صح وكفاية نسب الطلاق المخيفة اللى بتزيد يوم بعد يوم .
وعشان كل ده لازم نختار صح ونتحمل نتيجة إختيارنا ومنستعجلش مفيش حاجة اسمها لازم نتجوز قبل سن معين أو سن الجواز هيفوتنا سواء كنا بنات أو شباب طب ازاى نختار أو بمعنى أدق إزاى الشاب يختار أساعدك وأقولك إزاى تختار صح.
إختار اللى ضحكتها تملا وشها وتبقى جميلة وهى معاك من غير ما تحتاج لنقطة (ميك . أب) فى وشها اللى تستناك ومتفدرش تاكل أو تنام الا لما ترجع وتطمن عليك اللى تبقى مستعدة تسمعك وتسمع مشاكلك وتساعدك فى حل ليها فى أى وقت وكل وقت اللى تتحمل معاك المسئولية وتتحمل معاك البدايات حتى ولو كانت صعبة. إختار اللى تحس إنك اخترت 4 نساء فى نفس الوقت البنوتة والشقية والناضجة والأم . يعنى اللى ترضى ربنا فيك وتحب أهلك وتصونك فى وجودك وغيابك.
باختصار أختار اللى ما تحسش بطعم الدنيا الا وهى معاك ومتحسش إنها عايزة من الدنيا غيرك ومش شايفة رجالة تانية وإنت معاها . وأهم حاجة إنها تلاقى كل ده منك إنت كمان مش تبقى هى بس اللى كده وانت لاااااء .
وأقول كمان للبنت إختارى اللى بيحبك فى كل حالاتك اللى بيخاف عليك ويحترمك وتبقى أغلى حاجة عنده اللى بيرضى ربنا فى معاملته ليكى يعنى لو حبك يكرمك ولو كرهك ما يظلمكيش إختارى اللى بيكرم أهله وأمه واللى قعدته معاكى أهم حاجة عنده واللى لما تبقى تعبانة يقعد جنبك وياخد باله منك واللى فرحته بيكى عمرها ما تقل ولا تنتهى اللى يشوف فيكى كل نساء الدنيا وإنك لوحدك كفاية عنده (يعنى ماليه عينه )
إختاروا اللى تحبوا بعض بجد إنتوا الاتنين زى بعض وقد بعض عشان لو حصل يوم وانفصلتوا لأى سبب تسيبوا ذكرى جميلة لبعض بعد الانفصال .
